Suallarınızın cavabları

Aşağıda bu günədək daxil olmuş ən çox verilən sualların cavabları qeyd edilmişdir . İnternet səhifəmizin bu hissəsi Sizi maraqlandıran məsələlərə dair əldə edəcəyimiz yeni məlumatlara əsasən yenilənəcək.

Güzəştli mənzil nədir və onun hansı üstünlükləri var?

“Güzəştli mənzil” dedikdə Azərbaycan Respublikasının Prezidenti yanında Mənzil İnşaatı Dövlət Agentliyinin sərəncamında olan və vətəndaşların güzəştlə əldə edə biləcəyi mənzillər nəzərdə tutulur.
Belə mənzili əldə etdikdə vətəndaş iki əsas güzəştdən yararlana bilər:
1)    Güzəştli mənzilin satış qiyməti yerləşdiyi ərazidəki digər analoji mənzillərin orta bazar qiymətindən aşağıdır.
2)    Vətəndaş mənzili Azərbaycan İpoteka Fondunun, müddəti 30 ilədək olan güzəştli ipoteka krediti hesabına əldə etmək imkanına malikdir.
Eyni zamanda, mənzil vətəndaşa tam təmirli və mətbəx mebeli ilə təchiz olunmuş vəziyyətdə təklif edilir.

Güzəştli mənzili kim əldə edə bilər?

Güzəştlə mənzil əldə etmək hüququ olan şəxslərin kateqoriyaları Azərbaycan Respublikası Prezidentinin 16.11.2016-cı il tarixli 1113 nömrəli Fərmanı ilə təsdiq olunmuş “Azərbaycan Respublikasının Prezidenti yanında Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi Qaydası” ilə müəyyən edilmişdir. Həmin kateqoriyalar ilə BU KEÇİD vasitəsilə tanış olmaq mümkündür.

Güzəştli mənzillərin tikintisinə başlanılıbmı?

MİDA-nın ilk layihəsi olan Yasamal Yaşayış Kompleksinin tikintisinə 24 dekabr 2016-cı il tarixində start verilmişdir. 11,6 hektarlıq torpaq sahəsini əhatə edəcək və 1843 mənzildən ibarət olacaq Yasamal Yaşayış Kompleksinin tikintisi davam etdirilməkdədir.
Bakı şəhərində mənzilə tələbatın yüksək olduğunu nəzərə alaraq, 2-ci layihənin də paytaxtda həyata keçirilməsi barədə qərar qəbul olunmuşdur. Bakının Suraxanı rayonu ərazisində, Hövsan qəsəbəsinin yaxınlığında 20 hektarlıq ərazini əhatə edəcək Hövsan Yaşayış Kompleksinin layihələndirilməsi işi başa çatdırılmaq üzrədir.

Yasamal Yaşayış Kompleksinin hansı göstəriciləri məlumdur?

MİDA-nın ilk layihəsi olan Yasamal Yaşayış Kompleksi Bakı şəhərinin Yasamal rayonu ərazisində xarici dairəvi avtomobil yolunun kənarında (Qanlı gölün şimal hissəsində) 11,6 hektarlıq torpaq sahəsində inşa olunur. Kompleks 29 çoxmənzilli yaşayış binasından ibarət olacaq. Bunlardan 17-sinin 2-bloklu 9-mərtəbəli, 12-sinin isə 1-loklu 12-mərtəbəli olması planlaşdırılır. Bu binalardakı 1843 mənzildən 324-ü birotaqlı, 1052-si ikiotaqlı, 467-si isə üçotaqlı olacaq. Birotaqlı mənzillərin sahəsi təqribən 31-33 m2, ikiotaqlı mənzillərin sahəsi təqribən 50-58 m2, üçotaqlı mənzillərin sahəsi isə təqribən 70 m2 təşkil edəcək. Bütün mənzillər tam təmirli vəziyyətdə və mətbəx mebeli ilə birlikdə vətəndaşlara təklif olunacaq.
Yasamal Yaşayış Kompleksinin sakinlərinin rahat yaşayışını və zəruri ehtiyaclarının ödənilməsini təmin etmək məqsədilə ərazisində 240 yerlik uşaq bağçası və 960 yerlik orta ümumtəhsil məktəbini də əhatə edən müvafiq sosial infrastrukturun yaradılması, habelə ictimai iaşə, məişət və xidmət obyektləri üçün nəzərdə tutulan qeyri-yaşayış sahələrinin istifadəyə verilməsi nəzərdə tutulur.

Hövsan Yaşayış Kompleksi layihəsinin icrası hansı mərhələdədir?

Hövsan Yaşayış Kompleksi Azərbaycan Respublikası Nazirlər Kabinetinin 22.02.2017-ci tarixli müvafiq Sərəncamı ilə “MİDA” Məhdud Məsuliyyətli Cəmiyyətinə ayrılmış Bakı şəhəri, Suraxanı rayonu, Hövsan qəsəbəsinin qərb hissəsində yerləşən 20 hektarlıq ərazidə inşa olunacaq. Bu ərazi “MİDA” MMC-yə güzəştli mənzil tikintisi üçün ayrılmış ikinci torpaq sahəsidir.
Sözügedən torpaq sahəsində çoxmənzilli yaşayış binalarının tikintisini təmin etmək məqsədilə ərazinin “Şəhərsalma əsaslandırılması”nın hazırlanması işləri yekunlaşmaq üzrədir. “Şəhərsalma əsaslandırılması”na uyğun olaraq növbəti mərhələdə yaşayış evlərinin və digər sosial məqsədli tikililərin eskiz layihələri və işçi sənədləri hazırlanacaq, habelə mühəndis-kommunikasiya təminatı sisteminin və yol-nəqliyyat infrastrukturunun yaradılması işi müvafiq qaydada planlaşdırılaraq təşkil olunacaq.

Güzəştli mənzil əldə etmək hüququ olan şəxslər necə müraciət edə bilər?

Güzəştli şərtlərlə mənzil əldə etmək hüququ olan vətəndaşların müraciətləri elektron qaydada “Elektron hökumət” portalında yerləşən “Güzəştli mənzil” sistemi vasitəsilə qəbul olunur. Güzəştli mənzilin əldə edilməsi üçün müraciət gücləndirilmiş elektron imza (“Elektron İmza” və ya “Asan İmza”) vasitəsilə mümkündür. Elektron imza ilə müraciət vətəndaşların fərdi məlumatlarının mühafizəsini, “Elektron hökumət” portalı vasitəsilə aparılan əməliyyatların dəqiq və təhlükəsiz həyata keçirilməsini təmin edir. Sistemdən istifadə ilə bağlı ətraflı video təlimatla, habelə güzəştli mənzil almaq hüququna malik şəxslərin kateqoriyaları və hər bir kateqoriya üzrə təqdim edilməli sənədlərin siyahısı ilə BU KEÇİD vasitəsilə tanış olmaq mümkündür.
Bununla belə, “Güzəştli mənzil” elektron sistemindən istifadə ilə bağlı sualları cavablandırmaq və müraciətlərin sistemdə qeydiyyata alınmasında vətəndaşlara köməklik göstərmək məqsədilə Bakı şəhərində yerləşən 1, 3 və 5 saylı “ASAN xidmət” mərkəzlərində və Sumqayıt “ASAN xidmət” mərkəzində də müvafiq xidmət göstərilir.
Güzəştlə mənzil əldə etmək hüququ olan vətəndaşların müraciətlərinin qəbulu davamlı prosesdir. Vətəndaşın hansı tarixdə müraciət edəcəyindən asılı olmayaraq, elektron kabinetə sahib olmuş bütün şəxslər gələcəkdə mənzil seçimində bərabər hüquqa malik olacaqlar.

Müraciətlərin qəbulu nə vaxta qədər davam edəcək?

Güzəştlə mənzil əldə etmək hüququ olan vətəndaşların müraciətlərinin qəbulu davamlı prosesdir. Vətəndaşın hansı tarixdə müraciət edəcəyindən asılı olmayaraq, elektron kabinetə sahib olmuş bütün şəxslər gələcəkdə mənzil seçimində bərabər hüquqa malik olacaqlar.

Vətəndaşlar güzəştli şərtlərlə əldə edəcəkləri mənzillərin seçimini necə edəcəklər?

Satışa çıxarılan mənzillər haqqında elan dərc olunduqdan sonra güzəştlə mənzil almaq hüququ olan və qeydiyyatdan keçmiş şəxs elektron sistem vasitəsilə mənzili ünvan əsasında otaq sayı və mərtəbə göstərilməklə seçərək əldə edə biləcək. Qaydaya əsasən yalnız layihə üzrə tikinti işlərini 30 və daha çox faizi yerinə yetirilmiş binaların mənzillərinin satışa çıxarılması barədə elan verilə bilər. Elan satışın başlanmasına ən azı 30 gün qalmış veriləcək.

Güzəştli mənzillərin satışı nə vaxt başlayacaq?

“Azərbaycan Respublikasının Prezidenti yanında Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi” Qaydasına əsasən layihə üzrə tikinti işlərinin 30 və daha çox faizi yerinə yetirilmiş binaların mənzillərinin satışa çıxarılması barədə elan verilə bilər. Elan satışın başlayacağı gündən ən azı 30 gün əvvəl verilir. İlk mənzillərin satışına 2017-ci ilin sonunadək başlamaq planlaşdırılır.

Güzəştli mənzili necə seçmək mümkündür?

Satışa çıxarılan güzəştli mənzillər haqqında elan kütləvi informasiya vasitələrində dərc olunacaq, habelə güzəştlə mənzil almaq hüququ təsdiqlənmiş vətəndaşlara “Güzəştli mənzil” elektron sistemində şəxsi elektron kabinetləri vasitəsilə bildiriş şəklində göndəriləcək. Belə bildiriş almış hər kəs satışa çıxarılmış güzəştli mənzillərin yerləşdiyi yaşayış kompleksi və binalarla, habelə mənzillərin interyeri ilə virtual qaydada “Güzəştli mənzil” sistemi vasitəsilə tanış olmaq və növbəti mərhələdə seçimini etmək imkanını əldə edəcək.

 

 

Azərbaycan Respublikasının Prezidenti yanında Mənzil İnşaatı Dövlət Agentliyi

© 2017